Sunday, July 16, 2006

ذكريات أول مظاهرة

دايما أول مظاهرة عند أى حد مابتتنسيش , ذكرياتها دايما بتفطس من الضحك ... السبت 15/7/2006 كانت اول مظاهرة ليه , هى كانت وقفة احتجاجية على سلم نقابة الصحفيين و بنطالب بالافراج عن المعتقلين السياسين و أدى تفاصيل اليوم ده
الميعاد الساعة 6 مساء حاولت أوصل متأخر شوية يعنى على 6.15 بس سبحان الله الطريق كان سهل و وصلت بسرعة جدا , وصلت بدرى ربع ساعة كان فعلا فى ناس متجمعة على سلم النقابة و بتهتف و الامن عامل كردون على الرصيف اللى قدام السلم , يعنى يدوب السلم و حتة من الرصيف دى المساحة المسموح بيها و طبعا كمية عربيات الترحيلات يخض و منظر كردونات العساكر بأعداده اللى قد
عدد المتظاهرين تلات اربع مرات راح مكمل عليا , اما منظر البلطجية اللى الامن جايبهم خلص عليا
قلت هلف لفة و ادخل الساعة 6 على امل ان الناس تكتر واحشر نفسى وسطهم , لفيت نص ساعة و انا عمال الاغى نفسى , ادخل و لا امشى , طب هو الموضوع ليه لازمة اساسا يعنى بحاول اقنع نفسى بالهروب بس كان جوايا حاجة مش راضية توافقنى
قلت طب هامشى جنب النقابة و ابص عليهم كده اكنى يعنى معدى صدفة و شفتهم و لو اتشجعت ادخل او اكمل الطريق و طبعا كملت الطريق
رحت اشرب حاجة ساقعة و لسه بلاغى نفسى
وقررت انى لو مشيت يبقى ماتكلمش فى السياسة تانى و احط لسانى فى بقى و بلاش منظرة
ولو مبادئى دى على حق يبقى لازم ادخل المظاهرة
و الموضوع بقى موضوع مبادئ و رجولة و حاجات كده
اتجهت تانى ناحية النقابة بس المره دى حصلت المعجزة و دخلت جوه الحصار
وقفت شوية كده مابهتفش و بعد كده هتفت شوية , بس ماعجبنيش انى اكون لوحدى كده و حبيت اتعرف على الناس الموجوده
لفي على الوجوه الموجوده و قلت هدور على واحد من الناس المدونين و اللى علقت عندهم و هم علقوا عندى و اتعرف عليهم
شفت مالك قدامى بس ماعرفتش اتعرف عليه كويس لانه كان مشغول اوى اكنه ام العروسة فى الفرح , بس سألته عن محمد طاهر صاحب مدونة مواطن
شاورلى عليه و رحتله و اتعرفت عليه و عرفنى على كام مدون خالد صاحب مدونة هنا القاهرة
و كذا مدون تانى مش فاكر اساميهم اوى , اصل انا عندى زهايمر فى موضوع الاسامى ده
الموجودين كانوا مش كتير حوالى 100 واحد و شوية , غير ماتوقعت خالص بس مش مهم , انا استفدت اكتر انى اتعرفت على مدونين و ناس مهتمين بالسياسة فى مصر , بعد الوقفة كان فيه تأبين لواحد اسمه احمد عبد الله رزة داخل النقابة حضرت مع باقى الناس بس ماعجبنيش الوضع لان الراجل ده طلع علمانى و اللى طلع يتكلم عنه و يحكى سيرته كان بيقول انه علمانى بفخر و انا مابستحملش الناس دول , و خدت بالى كمان ان معظم الموجودين شيوعيين , خرجنا من القاعة على طول و قعدنا خارجها مع شباب كتير , منهم مدونين و نشطاء سياسين فى حزب الغد و حركة كفاية
شوية و روحنا
وكده خلص اليوم و على خير الحمد لله , و كل القلق اللى كان قبل المظاهرة ماكنش ليه لازمة و الموضوع بسيط و بيحصل كتير اساسا
و اللى استفدته فى اليوم ده هو انى كسرت حاجز الخوف و اتعرفت على مدونين


اليوم اللى بعده الاحد 16/7/2006 كان فى وقفة امام دار الحكمة لاجل فلسطين و لبنان و بما انى خلاص كسرت حاجز الخوف فقررت اروح و اشارك و فعلا رحت , نفس الوضع حبسينهم على السلم و كان موجود 10 عربيات امن و عساكر بالعبيط و البلطجية بتوع كل مظاهرة , بس المرة دى دخلت على طول من غير تردد , ده انا حتى شفت 3 و ولاد ماشيين جنبى و انا رايح و بيقولوا هندخل ازاى قلتلهم عادى انا داخل برضه و هنعدى من الجنب مافيهاش مشاكل , شفت نفس الوجوه اللى كانت موجوده فى وقفة اليوم اللى قبله , هتفنا شوية و مشينا , الموضوع طلع عادى و مافيهوش مشاكل و فيه عالم بايته فى الموضوع ده , تقريبا ماوراهاش حاجة غير المظاهرات
استفدت فى اليوم ده برضه انى اكدت على كسر حاجز الخوف و اتعرفت على زميل كان معايا فى الكلية اكبر منى بسنة و عارفه بالشكل
بس , رحت اتعرفت عليه و قابلت زميل ليا فى الكلية بس المرة دى كان اصغر منى بسنة جه بعد ما الوقفة خلصت للاسف , اتمشيت معاه شوية و اتكلمنا فى السياسة و اللى بيحصل فى البلد و ازاى الواحد يخدم قضيته و رجعت البيت و بدأت أكتب فى التدوينة دى بعد ما عملت كام تليفون بأكد على زمايلى علشان مسافرين بعد ساعتين من تاريخ كتابتى لهذه التدوينة


14 comments:

RCHAMMER said...

I don't know how to speak this language. Just in case you speak English, leave a comment on my blog
http://
theflippingsweetblog.
blogspot.
com
so I can get back here again.

RC Hammer

Sarwa said...

كل مظاهره وانت طيب وبتكسر حاجز جديد

Alaa said...

الراجل العلماني اللي مش عاجبك ده من أسباب أن مصر حاربت في 1973 و لو كنت قعدت شوية كنت شفت ازاي ناس من كل الملل و الانتمائات المختلفة بتحترمه.

و بعدين عرفت منين أن معظم اللي في القاعة كانوا شيوعيين؟

HANY said...

اعجبنى بشدة هذا البوست وأعجبنى اكثر وضوحك فى التعامل مع بعض التيارات المنتشرة الان فى نسيج مصر وأكيد هنتقابل قريب جدأ اكتب اليك هذا بقليل من السعادة افتقدتها فى الايام القليلة الماضية هذه السعادة تنبع من خبر ان حزب الله ربما يكون قد اسقط طائرة اف 16 ليتها تكون سقطط " اللهم سدد سدد "

arabesque said...
This post has been removed by a blog administrator.
arabesque said...

أحمد عبد الله رزة رجل محترم و رمز لجيل كامل و يا ريت بس نتعلم من استقامته و نزاهته ووقفته مع الحق حاجة بدل ما نمشي نوزع اتهامات- إذا اعتبرنا إن الانتماء السياسي سواء للشيوعية أو العلمانية اتهامات
بالمناسبة أنا كنت في المظاهرة و التأبين و مش شيوعية سيادتك

upsidedownworld said...

is a demonstration of 100 people really effective, i think it's about some people who discharge their fury & that's it, a demonstation that would be effective and worth going to , would be in thousands, so that it would have it's pressure on the government.

بحب مصر said...

اولا معلش على التأخير فى الرد لانى كنت فى اجازة و ما قعدتش ادام كمبيوتر بقالى اسبوع

sarwa
وانت طيبة و عقبالك

alaa
اولا انا ماقلتش ان الراجل ده مش عاجبنى , لانى اساسا ماعرفوش , انا قلت مابحبش العلمانيين

طبعا انا ماعرفش اللى موجودين افكارهم و انتمائتهم ايه بس انا حسيت ان كتير من الموجودين كانوا شيوعين و علمانيين و ان ماكنوش كده فهم بيساندوا الفكر ده
وانا مش عايز مصر تخلص من حكم مبارك و تروح للعالم دى

فى حاجة مقتنع بيها جدا , هى : مش كل واحد عمل حاجة كويسة او قال كلمة حلوه بسقفله , بحب دايما ابص لبعيد شوية , و بعدين لو دورت هتلاقى ان اى حد ظالم كان فيه فى حياته حاجات كويسة , اللى يهمنى طبعا ان القول او العمل يكون موافق للشريعة و العقيدة الاسلامية

hany
اكيد هنتقابل قريب ان شاء الله

arabesque
الراجل اللى طلع يعرف بأحمد رزه عرفه كعلمانى و تفاخر بذلك و لم يعرفه كمسلم ولو شايف انه ممكن يكون قدوة ليك انت حر

احتمال فعلا ماكنش فيه شيوعين كتير فى
المظاهرة و احساسى كان خاطئ

العلمانية و الشيوعية بتقول كلام ممكن يبان انه كويس و يفيد البلد و يخلصها من المشاكل الغرقانة فيها دلوقتى , بس لو حد هيخيرنى بين انى اكسب الدنيا او اكسب الاخره هاختار الاخرة , و فى نفس الوقت ممكن نكسب الدنيا و الاخرة لو اتمسكنا باسلامنا و عقيدتنا و ما وسخناهاش بعقائد تانية من صنع البشر

forsha
طبعا مظاهرة فيها 100 واحد مش هتودى و لا هتجيب بس لو ال100 دول كبروا دماغهم مستحيل هيوصلوا لالف
ويارب الشعب يفوء

Mr.GEMYHOoOD said...

بالراحة شويه على الراجل يا عم علاء

soosa el-mafroosa said...

و الله انت ضحكتني جدا و انت بتحكي ازاي قعدت تضيع في الوقت قبل ما تدخل و صعبت عليا قد ايه انت كنت خايف .. ماهو ده نتيجة غسيل المخ و كورسات المشي جنب الحيط اللي بتديهالنا الحكومة المصرية طول عمرنا..بس برافو عليك في الآخر وصلت ..عقبالي

بحب مصر said...

sosa el mafroosa
هى حاجة تضحك و تبكى فى نفس الوقت
عقبالك و عقبال كل الشباب و البنات المصربيين

Sampateek said...

أول مظاهرة كأول ولادة
مؤلمة مؤثرة غالية علي القلب
نتمني أن لا تكون أخر مظاهرة
و أقتبس قول ثورة
كل مظاهرة و أنت برة لازوغللي
-----------
شاركونا حملتنا في التفافة علي اليهود
زورونا لجمع اكبر عدد من التفافة لاغراق اليهود
خالص تحياتي

Anonymous said...

Looking for information and found it at this great site... inexpensive maternity clothes Counter statins conferencing meeting tool web0a cooking school for home chef Samsonite backpacks collection jolt messenger bag Arizona cabinets direct download norton anti virus gratis Remote viewers winning mega millions numbers on line culinary school Lincoln heritage illinois medicare supplement rates Best+training+tools+for+mcse Wholesale tenuate Medicare billing coding software Free black hardcore anal Pringles can wireless plans

Anonymous said...

Looking for information and found it at this great site... »